O Concello de Culleredo completou a reforma da rúa Estreita de Vilaboa, situada ao final do núcleo e que dá servizo a un importante conxunto de vivendas de carácter unifamiliar. Agora, a rúa presenta un aspecto renovado e con prestacións melloradas.

Os traballos centráronse, por unha banda, na instalación dunha nova canalización das augas pluviais. As características da vía, con elevada pendente e diferentes cotas provocaban acumulacións de auga que xeraban molestias aos veciños. Coa nova rede construída a auga baixará polos condutos e non quedará no firme.

E doutra banda, o Concello reformou o pavimento da rúa. Agora é de cor amarela, o que moderniza a contorna, e presenta propiedades antiescorregadizas, de gran importancia nunha rúa en pendente.

O proxecto xa se completou e contou cun orzamento de 69.000 euros, financiados pola Deputación da Coruña.