O primeiro tenente de alcalde de Culleredo, José Ramón Rioboo, visitou hoxe xunto ao presidente da Xunta, Alberto Núñez Feijóo, o centro de saúde do Portádego co obxectivo de analizar as necesidades do centro e ver as posibles solucións para a apertura do ambulatorio no mes de setembro. Rioboo asegura que o responsable autonómico coincide na imperiosa necesidade dunha zona de estacionamento pública para o ambulatorio xa que o centro está aberto a outras localidades como A Coruña.
O primeiro tenente de alcalde transmitiulle a preocupación do goberno local por esta problemática e lembroulle que o seu executivo xa ten unha solución que pasa por cambiar a cualificación dun solar, anexo ao centro de saúde. O executivo lembra que a aprobación do cambio de uso da parcela é prioritaria para facer nela un aparcadoiro.
O alcalde en funcións e o presidente da Xunta mostraron a súa satisfacción polo novo ambulatorio e destacaron a calidade do centro, "moi por riba dos construídos na comarca", apuntou Rioboo.