ES / GL

Culleredo completou un plan de incremento das prestacións do centro cívico de Fonteculler

2 Xaneiro, 2019. 20:42

O Concello de Culleredo acaba de acometer un plan de dotación de novas prestacións no Centro Cívico de Fonteculler. Os traballos responden a necesidades detectadas polos técnicos municipais nunha instalación que se utiliza a diario por actividades municipais deportivas, asociacións ou novas.

As obras consistiron na mellora de diversos equipamentos da dependencia. Na planta baixa instalouse pavimento deportivo, especializado para o uso interior, de 5 mm de espesor. Aumentará a comodidade e desempeño das actividades deportivas.

Doutra banda, o Concello dotou ao centro dun sistema de renovación de aire en toda a dependencia. Mellorará o confort no uso cotián. Na zona da cafetería dispúxose de climatización, co mesmo obxectivo.

Na terraza exterior cambiáronse os vidros por uns máis grandes. Conséguese así aumentar a seguridade dos máis pequenos.

Finalmente, o Concello acometerá unha limpeza da madeira da terraza, repoñendo as táboas danadas polo uso e executando un novo vernizado que mellorará o seu aspecto.

Esta batería de melloras supuxo un investimento municipal de 48.000 euros.