Unha vez efectuado o sorteo público do 23 de febreiro para seleccionar ao alumnado participante, o  Concello de Culleredo, a través do servizo de Dinamización, Formación e Emprego dá comezo o proxecto de formación para sustentabilidade ambiental, que promove a formación, plantación e produción de horticultura ecolóxica, constituíndose como unha actividade lúdico-educativa enfocada a veciñas e veciños do municipio co fin de fomentar a participación cidadá na recuperación dunha agricultura respectuosa co medio ambiente.

Así, organizouse unha reunión cos seleccionados e seleccionadas para darlles a benvida ao proxecto, para explicarlles o funcionamento do mesmo e atender ás súas consultas. Acudiron os concelleiros de Promoción Económica e Comercio, Juan Carlos Lovelle e Mario Iglesias, e a xefa do servizo, Isabel Buján.

A formación práctica comezou esta fin de semana no Centro Municipal Pablo Picasso, e estenderase ao longo de todo o 2021, coa combinación de sesións teóricas, prácticas e titorías individualizadas en horticultura ecolóxica que permitan aos participantes sacar o máximo rendemento dos hortos, sempre dentro do marco dunha agricultura respectuosa.