O alcalde de Culleredo, José Ramón Rioboo, mantivo hoxe un encontro co delegado do Goberno en Galicia, Pedro Blanco, para abordar diversas cuestións de interese para o municipio. Na  reunión tamén participaron a subdelegada do Goberno na Coruña, María Rivas, e a primeira tenente de alcalde, Cristina Pardo.

A conclusión das obras de rexeneración da Ría do Burgo e a súa afección ao Paseo Marítimo foi o principal asunto do encontro. Rioboo puxo de manifesto a necesidade de actuar en varios puntos da contorna, o máis afectado polos traballos ao albergar nos últimos dous anos o maior volume das intervencións, con circulación continua de maquinaria.

O delegado e o alcalde concretaron que levará a cabo un conxunto de actuacións no paseo marítimo para que quede en perfecto estado tras a finalización da dragaxe. Para definilas, técnicos de Costas e do Concello realizarán unha avaliación técnica sobre o terreo a vindeira semana.

A análise abordará ámbitos como os pavimentos, zonas verdes ou mobiliario urbano. A día de hoxe, o paseo pódese empregar con normalidade, pero é necesario acometer melloras que o deixen nun estado óptimo ao 100%.