O Auditorio Gustav Mahler do Conservatorio Municipal de Música de Culleredo acolleu esta mañá ‘A máquina das emocións’, un concerto didáctico por parte do profesorado para as nenas e nenos dos centros CEIP Plurilingüe Sofía Casanova, CEIP Isaac Díaz Pardo, CEIP Plurilingüe Ría do Burgo e CEIP Plurilingüe Vila de Rutis, enmarcado no programa EducaCulleredo. Participaron un total de 294 nenas e nenos dos dous primeiros cursos de Educación Primaria.

No mesmo, presentáronse algúns instrumentos como o piano, clarinete, saxofón, frauta traveseira ou o violín, amosando como a través da música podemos expresar e canalizar as nosas emocións. Tratáronse temas como o medo, a ira, a calma, a tristeza e a alegría.

Con esta actividade búscase salientar o valor da música por si mesma, reflexionando sobre como nos acompaña e forma parte da nosa vida diaria en moitas situacións. A escena situouse na habitación dunha nena que entre outros xoguetes, ten unha máquina de emocións, a cal ía soando segundo os seus sentimentos.

As nenas e nenos puideron ver no escenario a máquina cos seus músicos tocando, escoitando as melodías e descubrindo como a protagonista desfrutaba, se emocionaba ou mesmo se enfadaba.