A campaña de apoio ás persoas afectadas pola DANA emprendida polo Concello de Culleredo recolle unha inmensa chea de solidariedade por parte da veciñanza. En dous días que leva operativa a iniciativa, centos de persoas se achegaron polos puntos de recollida habilitados para colaborar.

 De acordo ás indicacións da Federación Española de Municipios e Provincias (FEMP), o Concello almacenará todo material recibido dada a situación loxística da zona. Enviarase posteriormente de acordo coa Federación Valenciana de Municipios e Provincias, coa que se coordina a campaña.

 O dispositivo segue aberto ata o venres 8. Os puntos de depósito son os seguintes:

• Edificio de Servizos Múltiples do Burgo: de 9.00 a 14.00 e de 17.00 a 20.00 horas
• Villa Melania (Vilaboa): de 9.00 a 14.00 e de 17.00 a 20.00 horas
• Centro Cívico de Fonteculler: de 17.00 a 21.00 horas
• Casa do Concello: de 9.00 a 14.00 horas

En canto ao material que se pode levar, requírense alimentos básicos (preferiblemente leite, latas de atún ou alimentación infantil), produtos de uso persoal, como calcetíns, e hixiene, ou artigos de limpeza doméstica.

Ademais, a FEMP aconsella á cidadanía efectuar doazóns económicas ás entidades que traballan no terreo. É o caso da Cruz Vermella, coa que se mantén unha colaboración. Pódese efectuar unha achega de forma sinxela mediante Bizum ao 33512, entre outros medios.

A iniciativa, desenvolvida polo Concello a través da Oficina Municipal de Voluntariado, e de acordo coa Agrupación de Voluntarios de Protección Civil, quere facilitar á veciñanza de Culleredo unha vía para apoiar ás persoas damnificadas ante esta catástrofe. 

O Concello informa de que se algunha empresa, negocio, asociación ou entidade desexa unirse a este dispositivo cunha colaboración máis ampla, pode  poñerse en contacto coa Oficina Municipal de Voluntariado a través do 620 008 450, tanto por teléfono como por WhatsAPP.

O Concello de Culleredo agradecede a enorme solidariedade que está amosando a veciñanza do municipioante un desastre desta magnitude.