ES / GL

Empezan os obradoiros prácticos en ecopercusión para o alumnado de 3º de Educación Primaria dos centros públicos de Culleredo

11 Noviembre, 2024. 16:57

Este luns, 11 de novembro, empezaron os obradoiros prácticos en ecopercusión nos centros públicos do Concello de Culleredo, destinados ao alumnado de 3º de Educación Primaria. Este é o segundo ano que se desenvolverán estes obradoiros en Culleredo, sendo á súa vez a primeira actividade do curso 2024-25 do programa municipal ‘EducaCulleredo’.

Desta maneira, dá comezo un programa que segundo destaca a tenente de alcalde e concelleira de Educación, Cristina Pardo, “complementa á docencia regrada, propoñendo un conxunto de ámbitos educativos de interese didáctico para o alumnado”, apuntando á súa vez que “unha das claves do seu bo funcionamento é que son os docentes de cada centro os que elixen as actividades para participar do amplo abanico que ofrece o Concello”.

Neste caso, trátase dun obradoiro impartido polos músicos Didier Díaz e Eduardo Ponce onde, a través de materiais reciclados convertidos en instrumentos improvisados, o alumnado de 3º de Educación Primaria introducirase en técnicas básicas para o desenvolvemento dunha banda de percusión. Nesta actividade, o alumnado descubrirá o potencial dos materiais de refugallo e a nova vida que poden ter, á vez que aprenden sobre música e potencian as súas habilidades e a súa creatividade.

Os obradoiros teñen dúas horas de duración e foron inaugurados este luns no CEIP Ría do Burgo e no CEIP Sofía Casanova. O martes, 12 de novembro, celebraranse as outras tres sesións programadas, repetindo o CEIP Ría do Burgo e engadindo unha sesión no CEIP Díaz Pardo e outra no CEIP Vila de Rutis.

Didier Díaz e Eduardo Ponce, os docentes que se encargan de dirixir esta actividade, pertencen ao colectivo ‘Ecopercusión’, especializado e organizado para servir como punto de apoio no ensino de todos os niveis e contribuíndo ao desenvolvemento da música instrumental, vocal e expresión corporal.