A alcaldesa en funcións, Raquel Jabares, e o concelleiro delegado de Servizos de Dinamización Local, Isidro Taibo, presentaron hoxe a programación de eventos que acollerá no mes de xullo o recinto multiusos do Burgo. Desde mañá, venres 1, ata o domingo 3, celebrarase o Mercado Templario do Burgo de Faro. Logo collerá o relevo, desde o 5 ata o 17 de xullo, a Feira dos Continentes. O mes pechará coas festas patronais da parroquia.

“Temos practicamente todo o mes completo”, sinalou Jabares, quen resaltou que desde a entrada do BNG no goberno local, púxose en valor o entorno da ría do Burgo. A nacionalista ten claro que coa realización destas actividades créase riqueza no concello, tanto no Burgo coma no resto de núcleos, dado que atraese a xente que consume en Culleredo.

“Proporcionamos un lecer alternativo de calidade que funciona como foco dinamizador”, asegurou a rexedora en funcións. Jabares lembrou que ano tras ano, especialmente desde xuño, o recinto conta cunha programación máis estable.

Taibo explicou que o Mercado Templario, que chega á súa carta edición, encherá o paseo marítimo de exposicións de olaría, cetraría, aparatos de tortura, encantadores de serpes, malabaristas, cesteiras e unha morea de actividades para todos os públicos. O mercado ábrese mañá ás 17.30 horas.

O concelleiro explicou que a Feira dos Continentes chega por primeira vez a Culleredo. O evento terá postos de artesanía de países como India. Exipto ou Rusia, gastronomía de Colombia, Alemaña, Exipto ou Arxentina e actuacións de Senegal, de tango arxentino, danza árabe, mariachis ou salsa cubana. Os postos abrirán os fins de semana mañá e tarde e pola semana, pola tarde.