O vindeiro luns 3 de Outubro iníciase en Culleredo a Programación do VII FESTIVAL DE TÍTERES “CONSORCIO DAS MARIÑAS” que organizan os nove Concellos que conforman o consorcio, nunha programación de alta calidade dirixida ás nenas/os da comarca, e que conta ca participación das mellores Compañías de Títeres do mundo.

Esta primeira actuación celébrase o luns día 3 ás 11:00 horas no Colexio Isaac Díaz Pardo do Burgo, na que actuará a COMPAÑÍA DE TEATRO EL ABROJITO de Arxentina co espectáculo “El lobo Rodrigo” que utiliza a técnica de luvas, variña e boca.

Unha versión distinta do tradicional conto de Carapuchiña Vermella. As personaxes actúan en roles diferentes ao coñecido relato e iso trae consecuencias e situacións tanto inesperadas coma divertidas.

A través do relato comprobaremos que se pode cambiar a historia para vivir mellor cando temos a convicción e o desexo de facelo, con amor, comprensión e respecto polo outro, para mellorar a nosa realidade.