Cheos de ilusión e con moita expectación chegaron os 80 pequenos e pequenas das escolas rurais de Culleredo ao Pazo de Vila Melania, en Vilaboa. Dirixíanse a conmemorar o Día Mundial da Árbore realizando unha plantación de árbores no recinto exterior da dependencia municipal.

Pero os pequenos sabían que a súa responsabilidade non se limitaba a ter que botar terra nos novos castiñeiros. Tiñan que elixir un nome para cada un deles, e a decisión non foi sempre sinxela. Finalmente, o bautismo terminou cos seguintes alcumes:

• Sorriso pequeno
• Papelote
• Rani
• Raio
• Teo
• Paco
• Aurora
• Nara
• David

 
A actividade foi organizada polo Concello de Culleredo, xunto co CRA de Culleredo (Colexio Rural Agrupado), onde estudan os 80 alumnos de Educación Infantil participantes. Tras a plantación, e tras visitar os hortos urbanos que florecen en Vila Melania, os nenos desfrutaron dunha actividade cun contacontos sobre as árbores e dunha merindiña.

Ata Vila Melania achegouse a concelleira de Educación de Culleredo, Carmen Varela, que non dubidou en botar mans á pala para axudar aos pequenos a plantar os castiñeiros. Varela considera “fundamental” que desde o Concello se lle preste a debida importancia a unha celebración coma esta para “impulsar bos hábitos medioambientais aos máis pequenos”.

“Queremos sensibilizar sobre a importancia das árbores no noso medio, os beneficios que nos producen e a necesidade de respectalas e coidalas” apunta. A concelleira reclama que nas políticas de sostibilidade que levan a cabo as administracións se teña moi en conta a educación como base de crear “unha verdadeira cultura ecolóxica”.

A actividade enmárcase na “Campaña Internacional de Mil Millóns de Árbores”, promovida polas Nacións Unidas para o Medio Ambiente (PNUMA). Esta campaña promove a plantación de árbores  autóctonos e que se adecuen as condicións medioambientais locais. O Concello recibiu felicitacións pola participación por parte do equipo que a promove. Rajinder Sian, dende Nairobi-Kenia, animou ao goberno local a participar un ano máis.

 Realizáronse plantacións tamén hoxe pola mañá nos centros de Educación Infantil e Primaria de Tarrío, Sofía Casanova, Isaac Díaz Pardo, Ría do Burgo e A Ponte Pasaxe.