O denominado aparcadoiro exprés comeza en Culleredo cuns resultados moi positivos. O pasado luns foi a primeira xornada de vixencia da medida, tras as dúas semanas de fase de probas concluídas. A Policía Local, presente ao longo de toda a mañá na contorna urbana, verificou que a utilización das prazas marcadas como aparcadoiro exprés rotou de forma continua, obxectivo primario da medida adoptada polo Concello de Culleredo.

Os axentes constataron que a maior parte dos condutores que aparcaron nestas prazas non permaneceron nelas máis que o tempo que necesitaron para realizar as súas xestións. Notábase especialmente na praza de Galicia, contorna banqueiro do Burgo, onde os coches alí parados marchábanse en 10 ou 20 minutos. De feito, a maior parte do tempo, en todas as zonas existía algunha praza libre para recibir novos vehículos.

Para os axentes, o aspecto que queda pendente de mellora é o emprego do dispositivo de control de horarios por parte dos cidadáns. Moitos permanecen no aparcadoiro exprés menos tempo do máximo estipulado (30 minutos), pero non colocan o disco horario. A Policía Local continúa informando da necesidade do seu uso, pero non denunciou aos condutores que cumpriron a norma de tempo aínda sen colocar o disco.

No entanto, o Concello insiste en que é obrigatorio sinalar a hora de chegada para propiciar un control efectivo do estacionamento. É posible recollelo no Edificio de Servizos Múltiples ou nos comercios situados xunto ás prazas,

O establecemento do aparcadoiro exprés responde a unha demanda de comerciantes e veciños, que veñen solicitando a posibilidade de contar con este tipo de aparcadoiro temporal, que lles permita realizar determinadas xestións curtas, en bancos, caixeiros, farmacias ou establecementos comerciais.

Implantouse nos puntos estratéxicos onde existe unha maior trasfega de vehículos e que por tanto convén solicitar un equilibrio no uso dos aparcadoiros. Posteriormente, o Concello podería estendelo a máis zonas urbanas de Culleredo dadas as vantaxes que leva.

A concelleira de Seguridade, Alicia Ferreiro, sinala que o se pretende especialmente é evitar excesos de condutores que deixan os seus vehículos durante moitas horas nestes puntos. Para iso, sinala existen no Burgo moitos aparcadoiros. "Non podemos ter ocupados vos puntos de maior actividade comercial cos mesmos coches cando existen alternativas", razoa.

Lugares e horario

O aparcadoiro exprés xurdiu despois de que o Concello de Culleredo observase a utilización do Burgo como lugar de aparcadoiro de vehículos privados, durante a xornada laboral. Isto colmataba, en numerosas ocasións, os aparcadoiros, xerando problemas de estacionamento aos usuarios ocasionais.

Tras analizar diferentes medidas para tentar facilitar o aparcadoiro para estes usuarios, o Concello elixiu a que considerou menos custosa para o Concello, veciños e usuarios que son os aparcadoiros exprés gratuítos. Trátase dun total de 40 prazas sinalizadas con pintura azul colocadas nos seguintes lugares:

 Os horarios establecidos para estes aparcadoiros exprés son de 9.00 a 14.00 e de 16.00 a 20.00 horas, en días laborais, e de 9.00 a 14.00 horas os sábados, sen ningún tipo de tarifa. Fóra destes horarios, estas prazas funcionarán como un aparcadoiro normal.