Todos os nenos de Culleredo serán escolarizados no municipio. É o resultado da Mesa de Escolarización celebrada onte no colexio de Tarrío, conformada polo inspector de Educación, a concelleira de Educación, Carmen Varela, e representantes dos centros públicos, os centros privados concertados, a ANPA e os sindicatos.

No caso da Educación Infantil e Primaria, o número de solicitudes era maior que o número de prazas. A Xunta habilitará un aula a maiores para 1º no colexio Ría do Burgo (A Corveira) para atendelas.

Son en concreto o CEIP Ría do Burgo e o CEIP Isaac Díaz Pardo (O Burgo) os que recibiron máis peticións que prazas dispuñan e que conformarán esa nova aula con 19 pequenos, quedando aínda 6 prazas máis libres. No CEIP Tarrío e no CEIP Sofía Casanova (Vilaboa) cóbrese toda a demanda.

Esta maior demanda de prazas que oferta deixa claro a necesidade dun novo CEIP. O Concello xa cedeu os terreos á Xunta para construílo en Vilaboa, nas proximidades de Acea de Ama.

No caso da Educación Secundaria, a situación antóllase máis urxente aínda. No IES Branco Amor, o número de solicitantes excede en 30 á oferta de prazas. Como solución, a Xunta utilizará unha aula reservada para reforzos para situalos.

A Mesa de Escolarización e o goberno de Culleredo trasladarán a urxencia de crear un novo IES á Consellería de Educación, que se situará en Acea de Ama, en terreos da antiga Universidade Laboral. Varela espera que a Xunta cumpra os seus prazos e que o centro poida funcionar para o inicio do curso 14-15.

A concelleira explica que se constata que "hai máis demanda que oferta de prazas tanto en Infantil e Primaria como en Secundaria, situación que vimos avanzando e que require unha actuación inmediata da Xunta". Coa necesidade de investimento demostrado, Varela demanda "celeridade" para evitar que a situación de saturación dos colexios de Culleredo se siga agravando.

Doutra banda, a edila anuncia que en setembro se escolarizarán no mesmo centro aos casos de irmáns que agora lles correspondeu dous colexios diferentes. A Mesa acordou que na convocatoria de setembro, cando o proceso finalice, garantirase que os irmáns estean xuntos, polo que Varela envía unha mensaxe de tranquilidade ás familias nesa situación.