O Concello de Culleredo abre este domingo, 12 de xaneiro, a tempada anual do feirón de Acea de Ama, cita xa tradicional na comarca que reúne por centos de persoas o segundo domingo de cada mes. O evento celébrase en horario de 10.00 a 15.00 horas na rúa Vicente Risco.

Ao redor de 140 postos conforman este feirón, que se celebra desde o ano 2005. Os asistentes poderán atopar unha ampla variedade de postos: alimentación, moda, complementos, téxtil, artesanía, bixutaría ou perfumaría.

Tamén no feirón pódense gozar dos tradicionais postos de churros e de polbo para acompañar a visita ao evento.

Para apoiar aos asistentes, o goberno de Culleredo porá en marcha un dispositivo de Policía Local e Protección Civil. A súa misión será a de atender calquera necesidade dos veciños e visitantes ao feirón.

Ademais, o Concello dispón de diferentes zonas para o aparcadoiro en Acea de Ama e así facilitar a mobilidade dos participantes.