O Concello de Culleredo pide aos veciños que adopten medidas preventivas para evitar unha posible estafa na revisión do gas. Segundo tivo coñecemento o Concello, nas pasadas datas tiveron lugar intentos de estafa desta forma na zona rural do municipio.

A Policía Local de Culleredo apunta que a clave para impedir estas prácticas pasa por asegurar que as persoas que van realizar unha revisión do gas son efectivamente revisores oficiais. Por iso, recomenda aos veciños que neguen a entrada ao seu domicilio aos revisores sen que previamente mostrase a credencial oficial.

En calquera caso de dúbida, o Concello explica que é preferible convidar o revisor a que volva outro día e verificar coa empresa de gas que efectivamente enviou a un traballador ao domicilio. Concertar con anterioridade a visita é outra forma de aumentar a seguridade.

Ademais, a Policía Local sinala que é obrigación das empresas revisoras emitir unha factura dos traballos realizados, coa debida identificación fiscal.

O Concello destaca que a prevención é a mellor forma de evitar este tipo de estafas e por iso tomar todas as precaucións é fundamental. En calquera caso, suxire aos veciños que ante calquera dúbida ou sospeita póñase en contacto coa Policía Local ou a Garda Civil para que poidan adoptar as medidas oportunas.