O Concello de Culleredo organiza a segunda edición do Obradoiro de lingua de signos, nun nivel básico. Tratarase dunha acción formativa totalmente gratuíta, que se desenvolverá entre o 21 de abril e o 5 de maio no Pazo de Vila Melania (Vilaboa).

Será un curso de carácter teórico-práctico para iniciar aos participantes na lingua de signos. Terá 20 horas de duración, sendo os horarios das sesións de 19.00 a 21.00 horas.

Para apuntarse ao obradoiro hai que dirixise á Concellaría de Educación desde hoxe día 7 ata o venres 11 de abril. Está situada en Vila Melania, tendo un horario de 9.00 a 14.00 horas.

O Concello oferta 20 prazas no curso. Terán preferencia as persoas empadroadas en Culleredo.