Esta edición dos campamentos urbanos de verán do Concello de Culleredo será multitudinaria. O goberno municipal decidiu incrementar as prazas para previstas, para poder dar servizo a todas as familias cullerdenses que as solicitaron.

En total, das solicitudes recibidas, 273 cumprían tanto o requisito de ser empadroados no municipio como de presentar necesidade de conciliar, finalidade principal da iniciativa, polo que foron admitidas automaticamente. O Concello recibiu outras 110 de residentes en Culleredo, pero que non presentaban necesidade de conciliación.

O goberno local, dado o interese amosado polos veciños, decidiu realizar un importante esforzo e admitir estas solicitudes. Ao non ter necesidade de conciliar, non inclúe o servizo de comedor. As restantes 12 solicitudes correspondían a non empadroados, polo que foron excluídas.

Así, os campamentos urbanos de verán, que comezarán o 23 de xuño, contarán con 383 participantes.  Serán nenos e nenas de entre 3 e 12 anos que están cursando actualmente desde 4º de educación infantil ata 6º de educación primaria.

Os campamentos terán lugar nas instalacións cedidas polos centros escolares Díaz Pardo, Ría do Burgo e Sofía Casanova e nos polideportivos municipais de Vilaboa e do Ría do Burgo. Como cada ano, o horario de campamento será de 9:00 a 14:00h, co servizo complementario de xantar de 14:00 a 15:30h.

A concelleira de Educación, Carmen Varela, destaca que os campamentos son espazos “tanto lúdicos como didácticos” onde se traballan valores de respecto, tolerancia, coeducación, non-violencia, ou hábitos saudables. “Por iso cremos que este esforzo por admitir a todos os cullerdenses ben merece a pena”, sinala.

Os pequenos desenvolverán actividades como xogos, deportes, confección de disfraces, construción de instrumentos musicais, pintado de murais, creación de esculturas…