A formación para os voluntarios e profesionais de Protección Civil é fundamental para o goberno de Culleredo de cara a ofrecer o mellor servizo de atención aos cidadáns. Neste sentido, o Concello colaborou coa Academia Galega de Seguridade no curso que se acaba de impartir na base de Protección Civil en Culleredo.

Nesta ocasión, o obxectivo consistiu en preparar aos efectivos para os labores de intervención ante accidentes de estrada. Participaron unha vintena de voluntarios e profesionais de diferentes municipios da comarca como A Coruña, Oleiros, Sada, Arteixo ou Culleredo.

O curso contivo tres bloques de contidos. O primeiro referiuse aos primeiros auxilios. Os alumnos adquiriron destrezas para a inmovilización de vítimas, o rescate en casos de incendios, ou o control do escenario en caso de catástrofes. Foi impartido por un médico do 061, Fernando Mosteiro.

O segundo bloque consistiu nunha introdución ás situacións de accidentes de tráfico: causas dos accidentes, como actuar, a sinalización, ou valoración de riscos. Foi impartido por Sergio Naya, coordinador de Emerxencias do Concello de Culleredo.

E o terceiro bloque centrouse na excarceración e no transporte de mercadorías perigosas. Os alumnos aprenderon a manexar equipos de excarceración e a actuar en caso de accidente dun vehículo que transportara mercadorías perigosas. Foi impartido polo bombeiro Mauricio Calvo.

Na tarde do sábado realizouse un simulacro de accidente de tráfico e os participantes tiveron que efectuar a correspondente intervención, incluíndo a excarceración.

O alcalde, Julio Sacristán, e o concelleiro de Protección Civil, Alberto Veira, acudiron ás prácticas. Destacaron a importancia da iniciativa para formar aos efectivos en situacións que son comúns na comarca. "É unha formación que pode lograr salvar vidas", afirmou Veira.