O Concello de Culleredo xa ten en marcha as obras de urbanización da parcela que acollerá un novo colexio de educación infantil e primaria. Sitúase na avenida de Rutis, entre Vilaboa e O Burgo, e o proxecto ten como obxectivo dotar ao terreo dos servizos necesarios para a construción do centro de ensino.

Os traballos comezaron polo necesario movemento de terras na parcela, un total de 1.500 metros cadrados. Logo colocarase zahorra artificial, levantaranse bordos e construiranse as beirarrúas.

Outro dos servizos que se proporcionará será o abastecemento. Instalarase a rede, conectándoa coa xeral da avenida de Ribados, deixando preparadas as acometidas para o novo centro.

En canto a saneamento, instalaranse 411 metros de colectores con 11 pozos de rexistro e 8 sumidoiros de pluviais.

Tamén levarase a cabo a instalación da iluminación pública, reformando o cadro de mando existente, canalizando a rede e colocando os puntos de luz. E a instalación para a rede de telecomunicacións, en vía subterránea.

O Concello destinou un orzamento de 190.000 euros á actuación, con parte do financiamento achegado pola Deputación da Coruña.