ES / GL

Plan especial de tráfico polas obras de asfaltado na Nacional 550

1 Julio, 2016. 18:02

Seguridade Cidadá

O Concello de Culleredo establecerá o sábado 2 e o domingo 3 de xullo un plan especial de tráfico con motivo dos traballos de asfaltado na Nacional 550. Este fin de semana as obras executaranse no Portádego e na Corveira, en concreto entre a rúa río Quintas (límite coa Coruña) e a igrexa de Vilaboa.

O plan comezará mañá ás 8.00 horas. Estableceranse cortes de carril regulados mediante semáforos. Segundo se vaia completando o asfaltado prohibiranse as cruces á esquerda e dereita da N550.

Na man dereita, dirección Vilaboa, os residentes no monte Alfeirán veranse especialmente afectados. Terán que acceder ás súas vivendas pola Xeca, rúa Xafontes e urbanización El Pinar. E poderán saír á N550 por Antón Vilar Ponte, que cambiará de sentido da circulación.

Na man esquerda, para dirixirse a Electo Carballo, Condes de Andrade ou avenida de Cordeda, entre outras, tomaranse as alternativas naturais xa que son rúas interconectadas.

O primeiro tenente de alcalde, José Ramón Rioboo, explica que unha patrulla da Policía Local en moto estará permanentemente na zona para ofrecer ao momento todas as indicacións necesarias aos veciños. O Concello xa publicou folletos informativos nestes días previos que se distribuíron pola zona.

En canto ao estacionamento, quedará prohibido na Nacional entre a rúa Río Quintas e a rúa Domingo Sierra. Todo este tramo xa está valado.

O Concello recomenda evitar o uso da N550. O tráfico pesado será derivado de forma obrigatoria na rotonda do aeroporto para tomar a Terceira Rolda.

A Policía Local pide aos particulares que empreguen tanto a AC-211 como a Terceira Rolda para evitar excesivas retencións na N550. Aconséllase ademais aos habitantes na Zapateira a evitar na medida do posible a estrada de Laxe.

Os traballos programáronse para os fins de semana para minimizar as molestias aos veciños e usuarios. Haberá unha parada polas festas de Vilaboa e logo continuarán ata chegar á rotonda do outlet.

Este é o paso previo á cesión da vía ao Concello, unha petición do goberno local para xestionar directamente a vía e atender con maior prontitude as demandas veciñais.