ES / GL

A Policía Local reforzará a vixilancia sobre os estacionamentos indebidos

20 Octubre, 2016. 14:48

Seguridade Cidadá

O Concello de Culleredo redobrará a vixilancia da Policía Local sobre os estacionamentos de maneira indebida de vehículos, especialmente sobre os que afecten á mobilidade dos peóns. Baixo a premisa de que en materia de seguridade viaria o primeiro é a persoa, o goberno local porá todos os seus medios para asegurar a convivencia entre o coche e o peón.

Nos últimos días detectáronse varios casos de condutas incívicas que o primeiro tenente de alcalde, José Ramón Rioboo, quere erradicar. Veciños puxéronse en contacto co Concello para manifestar as dificultades que teñen para pasar por beirarrúas cando un coche a ocupa para aparcar ou para utilizar os pasos de peóns de forma normal.

Os problemas agrávanse para o caso de persoas que levan carros de bebé. Unha das situacións máis graves prodúcese na rúa García Lorca, en Vilaboa, onde resulta imposible camiñar pola beirarrúa se hai un vehículo subido.

O Concello quere facer un chamamento á conciencia cidadá para eliminar este tipo de actitudes, non só pola infracción que cometen se non polas graves molestias que xeran a outros veciños. "Hai que pensar que deixar un coche sobre unha beirarrúa ou un paso de peóns, aínda que sexa só un instante, provoca riscos para os peóns", afirma Rioboo.

O Concello pide aos afectados ante estas situacións que avisen no momento á Policía Local de Culleredo para que interveña.

Foto: rúa García Lora, cortesía de @massiEsMas