O Concello de Culleredo recoñeceulle esta mañá o seu labor a DISMACOR polos seus vinte anos de traxectoria. O alcalde, José Ramón Rioboo, e a concelleira de Benestar Social, Lupe Pombo, fixéronlle entrega ao seu presidente, Manolo García, dunha Torre de Celas a escala cando se cumpren dúas décadas do nacemento desta Asociación de Pais de Nenos e Persoas con  Discapacidade das Mariñas Coruñesas.

Esta entidade, sen ánimo de lucro, nace para traballar na área da diversidade funcional ofrecendo unha atención integral tanto ás persoas afectadas por esta doenza como ás súas familias, mediante a oferta de varias modalidades de intervención.

Ofrecen atención psicolóxica e logopédica a domicilio, servizo de avaliación e diagnóstico, talleres grupais inclusivos de tempo libre e intervencións grupais nos contextos de lecer mediante a creación de actividades de tempo libre.

A súa función determínana as necesidades de cada persoa e familia, baseándose sempre en alcanzar a máxima calidade de vida posible para conseguir que as persoas con diversidade funcional poidan formar parte do seu grupo social como axentes de pleno dereito.