A igrexa de Santiago do Burgo recupera o seu papel monumental na parroquia cullerdense. A actuación de rehabilitación da contorna do templo entra na súa recta final e quen pasa xunto á obra xa adiviña a profunda transformación á que está a executar o Concello de Culleredo.

Pouco resta para que a igrexa románica quede realzada no Burgo. Principalmente, resta retirar unha columna de electricidade situada a poucos metros do templo e que lle resta protagonismo e estética. Por iso, o Concello xa solicitou permiso a Fenosa para quitar o poste.

Polo demais, os operarios xa case completaron a rehabilitación do espazo libre do ao redor da igrexa e do outro lado da AC-211. Os xogos infantís xa foron colocados, rodeados dun valo para dotalos de todas as medidas de seguridade. O céspede xa foi plantado e agora permanece valado para evitar que se estragar e propiciar que creza.

A previsión do goberno municipal pasa por que os traballos se finalicen antes de Semana Santa. O alcalde, Julio Sacristán, móstrase moi satisfeito polo resultado que estña cambiando a imaxe dun dos principais monumentos de Culleredo, asegura. "O obxectivo consistía en realzar a igrexa e a súa contorna e á vista está que se está conseguindo", apunta.

O rexedor explica que os veciños e usuarios da zona xa mostraron a súa beneplácito pola actuación do Concello. Sacristán considera que o diñeiro que custou a obra estivo "ben investido" dado que era "moi necesario" recuperar un espazo que se degradou.

En total, o investimento ascenderá a uns 380.000 euros, que son cofinanciados entre o Fondo Europeo de Desenvolvemento Rexional (FEDER) e as arcas municipais. Dado que os traballos afectan ás inmediacións dun elemento catalogado pola Xunta, resultou necesario recibir a autorización da Dirección Xeral de Patrimonio.

Características da actuacion

O obxectivo do Concello consiste en efectuar un cambio integral do espazo coa finalidade de pór en valor a igrexa e crear unha contorna agradable para os veciños de todas as idades no centro do Burgo. Para iso efectúase un tratamento tanto do atrio como da zona próxima ao templo coa colocación de laxas de granito, en conxunción coas características da paisaxe galega. O peche orixinal do atrio mantense e limpouse e colocou unha albardilla de granito para que poida ser utilizado como banco corrido nas zonas máis baixas.

No lateral do atrio paralelo á estrada que vai cara O Temple, a AC-211, substituirase a varanda existente por outra de pletinas de aceiro galvanizado, cun deseño sinxelo que se adapta á contorna e facilita a visión da igrexa. O muro de formigón reparouse e recibiu un chapado de mampostería. As zonas exteriores do muro serán eliminadas e creáronse terrapléns axardinados.

En canto á rúa San Iago, paralela ao peche orixinal e que funciona como vía de acceso ás vivendas posteriores, requiriu tamén un proceso de rehabilitación, partindo desde a súa pavimentación. A actuación continuou no espazo situado enfronte da igrexa, alén da AC-211. Alí se realizaró unha praza elevada, con zonas duras empedradas e zonas verdes de descanso. O paso de vehículos para acceder aos vaos será permitido.

Co proxecto, o Concello aproveita para crear un novo lugar de esparexemento na parroquia do Burgo. A praza aberta fronte ao atrio actuará de nexo de unión entre a igrexa e un conxunto de zonas verdes, áreas de descanso e xogos infantís, todos protexidos mediante un conxunto de vexetación.

Como en todas as intervencións na vía pública que leva a cabo, o goberno local cullerdense coidará mediante a obra as normas de accesibilidade. Así, os peóns poderán camiñar con seguridade xa que se salvarán os niveis que existían.