O Concello de Culleredo comezou as reunións previstas cos grupos municipais da oposición de cara á aprobación do Plan Xeral de Ordenación Municipal. O equipo redactor expuxo as liñas xerais e obxectivos do documento, con anterioridade desta forma á Comisión Informativa de Urbanismo.

Á reunión, celebrada na casa consistorial, acudiu o alcalde, Julio Sacristán, o concelleiro de Urbanismo, Diego Taibo, e portavoces dos grupos municipais.
 

O goberno local prevé levar a aprobación inicial o Plan o próximo 31 de xaneiro, unha vez se dispoñan dos informes xurídicos e técnicos previstos na Louga. Unha vez aprobado polo pleno municipal, procederase á publicación do anuncio no DOG, tras o que se procederá a abrir o período de información pública por dous meses e a dar audiencia aos Concellos limítrofes.

Ao mesmo tempo, o Concello de Culleredo solicitará os informes sectoriais necesarios que haberán de ser emitidos no prazo dun mes, salvo que a lexislación sectorial sinale outro prazo.
 

Calendario de tramitación do Plan previsto polo equipo de goberno:  

• Reunións cos grupos municipais da oposición: mes de xaneiro
• Ditame da Comisión de Urbanismo: 24 de xaneiro
• Pleno de aprobación inicial: 31 de xaneiro
• Período de información pública: comezará a semana do 11 de febreiro (depende da publicación no DOG)

O alcalde explica que o Plan Xeral de Culleredo é un instrumento urbanístico complexo, tendo en conta a centralidade do municipio respecto da área metropolitana e da cidade. Culleredo é territorio de paso dunha serie de infraestruturas: gasoduto, oleoduto, autoestrada, autovía, aeroporto, ferrocarril, ribeira do mar, e o abastecemento de auga á cidade, infraestruturas todas elas que xeran unhas servidumes importantes que afectan os predios e solares, e que obrigan a cumprir unha serie de determinadas sectoriais importantes que complican a ordenación e xestión do chan. Practicamente o 50 % do territorio ten algún tipo de servidume.

O documento do plan analiza minuciosamente a realidade de Culleredo, tanto a nivel de pirámide poboacional, como de infraestruturas, equipamentos, sistemas xerais e locais, as súas debilidades e fortalezas, a ocupación do chan, as zonas forestais e agrarias, os núcleos de poboación, os asentamentos poboacionais, en número de 58.

 
A partir da análise desa realidade tenta achegar solucións para o crecemento dos núcleos, os novos equipamentos, as infraestruturas varias, os servizos básicos e un estudo económico-financeiro que o soporta, de cara a conseguir os seguintes obxectivos:

• Crecemento racional e sustentable.
• Mellora de infraestruturas.
• Novos equipamentos básicos
• Protección das ribeiras e canles dos ríos.
• Protección das zonas agrícolas e forestais.
• Concreción da malla urbana, eliminando os crecementos lineais ao bordo de infraestruturas viarias.
• Protección de elementos patrimoniais, etnográficos e paisaxísticos