O Concello de Culleredo acaba de concluír as obras de mellora de firme na parroquia de Almeiras. En concreto, os traballos de pavimentación desenvolvéronse na rúa Laberinto e a súa contorna, en Vigovidín.

Trátase dunha zona que alberga a numerosas vivendas, conectadas por un conxunto de diferentes pequenas vías, cuxo firme foise deteriorando co paso do tempo. Isto levou ao goberno local que preside Julio Sacristán a incluír os traballos no Plan de Obras e Servizos que financia a Deputación.

A obra inclúese nun paquete de 50.230,34 euros, que tamén serviron para a ampliación e asfaltado da rúa Mosteiro de Sobrado, en Acea de Ama, de recente conclusión.

Ademais, o Concello iniciou os traballos de mellora da rede de saneamento na rúa Choeira, tamén na parroquia de Almeiras. É unha actuación emprendida pola empresa adxudicataria do servizo municipal de saneamento, concesionado o ano pasado.

A obra consiste na construción da rede de recollida de pluviais, evitando por tanto que a auga da choiva se introduza na rede de saneamento ao estar separadas. Con esta intervención e varias similares que contempla este plan corrixiranse conexións da rede de pluviais ao saneamento que, aínda que loxicamente non causaban ningún problema ambiental, sobrecargaban o sistema de forma innecesaria ao introducir auga limpa no tratamento de fecais.

Sacristán, sinala que a realización de obras de mellora destas infraestruturas foi unha "constante" na acción do goberno local que dirixe. O rexedor sostén que na época económica actual, as administracións deben dedicar os  "principais esforzos" aos servizos básicos dos veciños.