O pleno de Culleredo aprobou o regulamento dos ficheiros de datos de carácter persoal do Concello. Trátase da regulación dos arquivos, automatizados ou non, que conteñen e procesan datos persoais.

O regulamento determina a finalidade de cada ficheiro, as persoas ou colectivos dos que se obteñen, a súa estrutura e descrición ou o órgano responsable do mesmo. Así mesmo, o texto marca ante que servizos ou unidades pódese exercer o dereito de acceso, rectificación, cancelación ou oposición, e o nivel de medidas de seguridade.

En total, son 16 os ficheiros de datos de carácter persoal que se crean con esta proposta do goberno local. Van desde o persoal, aos servizos sociais, o padrón, os rexistros ou a seguridade cidadá.


Certificados electrónicos

Doutra banda, o pleno acordou delegar na Deputación da Coruña a tramitación dos certificados electrónicos. Isto efectuarase mediante unha encomenda de xestión, pola que a institución provincial encargarase das solicitudes de emisión, suspensión e revogación destes certificados.

Os certificados aos que se refire esta encomenda son os de Administración Pública, incluídos na lei 11/2007: de persoal ao servizo da administración, de sede electrónica e de actuación administrativa automatizada (selo electrónico).

A petición de emisión, suspensión ou revogación destes certificados á Deputación será realizada por persoal delegado competente do Concello, utilizando para iso o seu certificado persoal clase 2.