O Concello de Culleredo acometeu a remodelación da rúa Xafontes, de Vilaboa. O plan de melloras na rede viaria confeccionado polo goberno municipal incluíu esta rúa dada a necesidade de renovar a calzada, deteriorada co paso do tempo.

O Concello destinou 20.700 euros a esta actuación, desenvolvida no tramo desta rúa que enlaza a rúa Conduzo coa ponte sobre a AP-9, discorrendo en paralelo a esta autoestrada. O viario é especialmente utilizado polos veciños de Vilaboa, Laxe ou Conduzo.

Con esta mesma intención de mellora da seguridade viaria e das condicións en determinados puntos da rede viaria municipal, o Concello de Culleredo levará a cabo de forma inmediata as seguintes obras polos seguintes importes:

• Reparación do pavimento nas rúas Hersa e Sanjurjo de Carricarte: 15.954,25 euros
• Pavimentación no núcleo de Orro: 16.033,06 euros
• Asfaltado na rúa Templarios (O Burgo): 17.905,37 euros
• Pavimentación nas parroquias de Celas, Culleredo e O Burgo: 20.613,97 euros
• Reparación do muro, pavimento, varanda de protección e beirarrúas nas rúas Alfonso VII e Mosteiro de Carracedo: 20.642,98 euros

A mellora das infraestruturas viarias constitúe unha constante de actuación para o goberno de Culleredo, que aposta por dedicar os principais esforzos investidores ás necesidades básicas dos cidadáns. Estas actuacións son deseñadas polo Concello e financiadas pola Deputación da Coruña.