O Concello de Culleredo acometeu a mellora do firme nunha das rúas máis céntricas do núcleo urbano do Burgo. Trátase da rúa Templarios, situada a escasos metros da ponte romana da ría.

O plan de melloras na rede viaria confeccionado polo goberno municipal incluíu esta rúa dada a necesidade de renovar a calzada, deteriorada co paso do tempo. O Concello destinou 17.900 euros a esta actuación, que beneficiará especialmente ás decenas de veciños da contorna.

Con esta mesma intención de mellora da seguridade viaria e das condicións en determinados puntos da rede viaria municipal, o Concello de Culleredo está a levar a cabo as seguintes obras polos seguintes importes:

• Reparación do pavimento nas rúas Hersa e Sanjurjo de Carricarte: 15.954,25 euros
• Pavimentación no núcleo de Orro: 16.033,06 euros
• Pavimentación nas parroquias de Celas, Culleredo e O Burgo: 20.613,97 euros
• Reparación do muro, pavimento, varanda de protección e beirarrúas nas rúas Alfonso VII e Mosteiro de Carracedo: 20.642,98 euros
• Asfaltado na rúa Xafontes (Vilaboa): 20.700 euros (xa completada)

A mellora das infraestruturas viarias constitúe unha constante de actuación para o goberno de Culleredo, que aposta por dedicar os principais esforzos investidores ás necesidades básicas dos cidadáns. Estas actuacións son deseñadas polo Concello e financiadas pola Deputación da Coruña.