O Concello de Culleredo e a Asociación Galega contra as Enfermidades Neuromusculares (ASEM) traballan de forma conxunta buscando un apoio para as persoas en situación de dependencia.

Ambas as institucións asinaron en 2012 un convenio para a formación, tanto de dependentes como de familiares e profesionais, en hábitos, técnicas ou recursos que poidan mellorar a súa autonomía e favorezan os labores de coidado.

Con esta finalidade, a Concellaría de Sanidade, que dirixe Penélope López, e ASEM desenvolven o I Ciclo Formativo Sociosanitario no municipio. O venres 18 de outubro tivo lugar a terceira xornada deste ciclo, que versou sobre os hábitos posturales saudables e as regras para a vida diaria. Celebrouse no Pazo de Vila Melania (Vilaboa).

A formación foi impartida pola terapeuta ocupacional, Minia Canedo, especializada na materia, membro de ASEM, e ademais monitora de Pilates.

A seguinte xornada do ciclo terá lugar o 22 de novembro e versará sobre as novas tecnoloxías adaptadas para as persoas con discapacidade.