O Concello de Culleredo busca introducir o concepto de ética nos seus investimentos. Políticos e técnicos do Concello recibirán o xoves 7 de novembro unha formación encamiñada a que a actividade económica desde a propia administración garanta a responsabilidade.

Trátase dunha acción enmarcada no Fondo Galego de Cooperación e Solidariedade, do que forma parte e co que colabora habitualmente o Concello. O "Taller de compra pública responsable e ética (da teoría á práctica)" terá lugar no Pazo de Vila Melania e estará impartido pola ONG especializada Amarante Setem.

O Concello de Culleredo, desde a súa Concellaría de Promoción Económica e Formación e desde a Concellaría de Sanidade, comparte o obxectivo do Fondo de camiñar cara a modelos de consumo que teñan en conta determinados niveis de ética que primen criterios sociais e ambientais

O goberno local aposta por que se garantan os dereitos dos traballadores, así como a preservación do medio ambiente, entre outros. Ademais, o Concello pretende a promoción destes modelos, razóns polas que se apostou por esta actividade de forma conxunta co Fondo Galego de Cooperación.