O Concello de Culleredo concluíu a formación ás forzas de seguridade do municipio como mediadores ante condutas adictivas. O balance da iniciativa é moi positivo e implicará o establecemento dunha colaboración permanente entre Policía Local e Garda Civil con Servizos Sociais para levar a cabo funciones de prevención e actuación ante calquera tipo de adicción.

O primeiro tenente de alcalde, e responsable de Seguridade Cidadá, José Ramón Rioboo, presidiu a clausura da formación, que tivo lugar no pazo de Vila Melania de Vilaboa. O edil entregou os diplomas acreditativos á vintena de policías locais e gardas civís participantes.

Rioboo apuntou ao camiño da coordinación entre forzas de seguridade como o idóneo para lograr os mellores resultados en materia de seguridade cidadá no municipio. Agradeceu a implicación dos efectivos nesta formación, para a que dedicaron horas libres da súa xornada.

"O traballo conxunto entre as nosas forzas de seguridade só produce beneficios para os cidadáns", subliñou. Rioboo destacou a importante aposta promovida desde a Concellaría de Sanidade para levar a cabo este Plan Municipal contra as Condutas Adictivas, que agora ao involucrar directamente ás forzas de seguridade favorecerá a que cheguen aos circuítos de Servizos Sociais os casos máis difíciles.

O protocolo de coordinación que se creará entre as forzas de seguridade e a área municipal de servizos sociais para poder loitar contra este tipo de condutas incluirá unha mesa de traballo coa presenza do tres partes. Coa implicación dos axentes búscase lograr unha "maior eficacia" con sectores de poboación como menores, persoas en situación de consumo activo ou persoas con enfermidades mentais.

A formación correu a cargo de técnicos de Servizos Sociais do Concello, traballadores sociais e psicólogos de ACLAD, o subdirector do Centro de Menores Concepción Arenal da Coruña, e a avogada da asociación Antonio Noite da Coruña.