O Concello de Culleredo proponse a eliminación das fochancas da rede viaria municipal. Co paso do tempo, algúns puntos dos firmes dos camiños e estradas propiedade do Concello fóronse deteriorando, polo que o goberno local decidiu encargar unha campaña de rebacheo que se estenderá a todas as parroquias do termo municipal.

Os traballos comezarán de forma inminente. Os puntos a mellorar foron trasladados polos propios veciños ao Concello ou foron detectados polos servizos municipais. Para acometer esta campaña contra as fochancas, o Concello destinará uns 30.000 euros das arcas municipais.

Os traballos consistirán na reparación de firmes. Nos casos de estradas que se inclúan nos próximos plans de obras municipais, o Concello efectuará arranxos nos puntos de maior necesidade, dado que a vía remodelarase en breve.

Neste sentido, o Concello de Culleredo levará a cabo en 2014 un amplo conxunto de obras de mellora nas vías municipais. O investimento superará os 400.000 euros.

Así, as actuacións de renovación do pavimento que realizará o Concello terán lugar en:

• Rúa Largo Caballero
• Praza de Europa
• Andrés Pan Vieiro
• Rafael Alberti
• Conexión de Vinseira a Celas
• Constitución
• Estrada de Vinseira a Sueiro
• Oos Condes
• As Granxas
• Conde de Lemos
• Joaquín Sorolla
• Avenida do Portádego

A estes proxectos únese o que acaba de completar o Concello na avenida Juan Carlos I, do Burgo, unha das de maior circulación do municipio.