O Concello de Culleredo informa os veciños, mediante bandos de alcaldía, das medidas a tomar con motivo do paso da Volta a España polo municipio, o vindeiro mércores 10 de setembro. O obxectivo destas medidas consiste en garantir a seguridade no transcurso da proba.

Por unha banda, efectuaranse diversos cortes de tráfico na franxa estimada de paso da Volta, primeiro da caravana publicitaria e logo dos ciclistas. A duración destes cortes variará segundo o horario definitivo de paso dos corredores.

Os cortes que se producirán son os seguintes:

• A partir das 15.00 horas: estrada de Orro, rúas José Ramallo, Constitución e María Román.
• A partir das 15.40 horas: estrada AC-400 ao seu paso por Valiñas, O Casal, Vinseira Pequena, Celas e Peiro de Arriba.

Será necesario así mesmo evitar o estacionamento nas beiravías das estradas por onde discorra a Volta.

Ademais, o Concello pide aos veciños que extremen as medidas para que os cans permanezan ben atados, e evitar así calquera incidente por saídas cara á carreira.