O Concello de Culleredo moderniza e incrementa a súa frota de vehículos para mellorar a prestación de distintos servizos municipais. O goberno municipal presentou 5 furgonetas e un turismo que reforzarán os servizos sociais, medio ambiente, promoción económica e os servizos xerais do Concello.

O acto, celebrado diante da Casa do Concello estivo presidido polo alcalde de Culleredo, Julio Sacristán, acompañado do primeiro tenente de alcalde, José Ramón Rioboo, e da concelleira de Promoción Económica, Marta Iglesias. Os responsables da concesionaria do contrato explicaron as características e funcionalidades dos novos vehículos.

O alcalde explicou que o Concello leva a cabo este ano un importante esforzo económico para ampliar o parque móbil municipal con obxecto de que o persoal "dispoña de medios acordes coas necesidades dos servizos municipais".

Os novos vehículos, que funcionarán desde xa, distribúense da seguinte maneira:

• Unha furgoneta e un coche para servizos sociais
• Dúas furgonetas para medio ambiente
• Unha furgoneta con remolque para promoción económica
• Unha furgoneta para servizos xerais do Concello

Sacristán sinalou que os vehículos asociados a servizos sociais destinaranse a importantes programas, como axuda a domicilio ou ao centro de formación ocupacional para persoas con discapacidade intelectual da Escada. Os restantes servirán para diferentes labores de traslados e transporte das concellarías.

En todos os casos, o Concello contratou os vehículos mediante a modalidade de renting, cun prazo máximo de 4 anos.