No centro do Burgo atópase un espazo que concentra a diario por centos de veciños. A praza de Europa é o núcleo neurálxico dos paseos familiares, dos xogos dos nenos ou dos cafés dos maiores. Desde agora, a praza loce nova imaxe, tras a actuación levada a cabo polo Concello de Culleredo.

O seu uso continuado foi deteriorando algúns dos elementos deste espazo público. Isto levou ao goberno municipal a encargar un proxecto de mellora da praza, que incluíu no Plan de Obras deste exercicio.

A praza de Europa dispón agora dun pavimento de cor avermellada. Ademais do novo aspecto, este pavimento é especial para evitar os resbalones dos viandantes en días de choiva, algo que o equipo de goberno priorizou para aumentar as prestacións do recinto.

Os bancos de madeira da praza tamén son obxecto dos traballos. Os que estaban máis deteriorados están a ser arranxados, tal e como se pode xa ver na praza.

O parque infantil é outro dos puntos de actuación, actualmente en marcha. O Concello colocará un novo chan de caucho para mellorar a seguridade infantil ao responder mellor ante posibles caídas. O recinto atópase agora valado mentres dure a actuación.

E a rúa Largo Caballero, que rodea a praza, tamén experimentou as obras. O Concello renovou o firme da calzada e o pavimento da beirarrúa.

O investimento total, de preto de 90.000 euros, mellora notablemente a seguridade viaria e as condicións dunha zona situada no corazón do núcleo.

O alcalde de Culleredo, Julio Sacristán, explica que a intención foi "mellorar as condicións dun lugar de referencia para os veciños". Asegura que as obras en espazos públicos e na rede viaria e beirarrúas serán "unha constante" en Culleredo.