O parque infantil da Costa da Lonxa, no Burgo, un dos máis utilizados no municipio, xa loce a súa nova imaxe. O Concello de Culleredo completou os traballos de reforma e desde o pasado venres as familias aproveitaron o bo tempo para gozar do espazo.

O Concello substituíu o antigo chan de grava por caucho. É un chan de tipo continuo, para favorecer aos usuarios con problemas de mobilidade. E non falta a cor, acorde co uso infantil.

O goberno municipal avanza que colocará algún novo elemento no parque, aproveitando o espazo libre que aínda dispón. A planificación do Concello pasa por dotar á rede de parques municipais de elementos para bebés e nenos con mobilidade reducida, así como xogos de mesas de ping pong especiais para estes parques.

Concluídos os traballos en Costa da Lonxa, o Concello xa inicia a actuación noutro dos parques máis concorridos: o emprazado no paseo de Tierno Galván, en Acea de Ama. O espazo xa está valado para acometer as obras, consistentes tamén na instalación de chan de caucho.

En total, o investimento municipal superará os 350.000 euros para modernizar 9 parques. O goberno local ampliará o espazo dos parques da avenida de Juan Carlos I, no Burgo, e o do Parque da Torre de Celas. A súa superficie duplicarase aproximadamente.

E procederá a substituír o chan dos seguintes parques, ademais de nos dous anteriores e nos xa mencionados: Centro social de Sueiro, Goiente (Sueiro), A Senra, Centro social de Sésamo, e o José Prieto na Corveira, onde o Concello instalará as innovadoras cubertas para alargar o tempo de uso e paneis de vidro de seguridade para protexer aos nenos do vento.

O novo firme de caucho ten como finalidade evitar accidentes por caídas e impedir a penetración da auga da choiva. Ademais, melloraranse os peches perimetrales. Noutros casos substituiranse xogos que se foron deteriorando co paso do tempo.