O alcalde de Culleredo, Julio Sacristán, e o primeiro tenente de alcalde e responsable de Obras, José Ramón Rioboo, visitaron as obras de construción de beirarrúas na Ermida, que executa a Deputación da Coruña. Estiveron acompañados de técnicos da institución así como do deputado responsable de Obras e Vías, José Manuel Pequeño.

O obxectivo da visita foi acordar diversas correccións na actuación, que ademais chegou herdada por parte do anterior goberno provincial cun gran atraso. No encontro de hoxe concretáronse variacións en aspectos como a entrada a algunhas das vivendas e a posición de pasos de peóns e elementos de seguridade viaria.

Os técnicos confían en que as beirarrúas poidan estar concluídas sobre o mes de xaneiro ou febreiro. Quedaría nese momento o aglomerado, que depende da retirada dos postes de telefonía e electricidade. Esta actuación está agora mesmo en fase de contratación, dado que se require un contrato diferente a nivel administrativo.

Sancristán e Rioboo esperan que con estas accións acordadas hoxe o proxecto avance con toda a celeridade posible para que os veciños dispoñan dun espazo seguro para camiñar que reclaman desde hai moitos anos.