O Concello de Culleredo terá en conta consideracións de tipo social nas súas contratacións. Así o aprobou o pleno onte, cos votos a favor de todos os grupos excepto o PP que se abstivo. A proposta foi elevada polo Concello por mor da moción presentada no seu día pola Marea Veciñal de Culleredo e que quedou pendente dos informes xurídicos municipais.

Son un total de cinco os criterios sociais que se introducirán nos pregos de condicións administrativas particulares. En primeiro lugar, garantirase que en caso de empate entre dous ou máis empresas na proposta máis vantaxosa terá preferencia na adxudicación aquela con maior número de traballadores fixos con discapacidade.

En segundo lugar, introdúcese nos pregos unha cláusula, cando así se considere, establecendo como condición especial de execución a contratación de persoal inscrito nos servizos públicos de emprego.

En terceiro lugar, nos contratos que polas súas características se considere apropiado, poderase incluír unha cláusula que determine a aplicación dun Plan de Igualdade específico por parte da empresa. Deberá contemplar políticas de acceso ao emprego, clasificación profesional, calidade e estabilidade laboral, e duración e ordenación da xornada laboral.

En cuarto lugar, poderase requirir un compromiso do adxudicatario de aplicar ao persoal adscrito á execución do contrato as condicións laborais que figuren no convenio laboral que resulte de aplicación.

E en quinto lugar, se decide que os pregos con algunha das anteriores condicións figure como cláusula específica de resolución o incumprimento das mesmas.