Culleredo conta, especialmente na zona rural, con diversos lavadoiros nas súas parroquias. Algúns deles seguen sendo utilizados con asiduidade polos veciños. É o caso do lavadoiro de Bo Home, en Almeiras.

O Concello, coa intención de mellorar a instalación, acometerá a renovación da praza adxacente. Actualmente este espazo ten o firme, de area, deteriorado, o que mingua as súas prestacións.

Por iso, o Concello de Culleredo remodelará esta pequena praza coa construción dunha soleira de formigón que lle sirva como base. Sobre ela colocará distintos elementos de mobiliario urbano, como bancos, para propiciar o descanso para os usuarios do lavadoiro e en xeral para calquera veciño que pasee pola zona.

O investimento alcanzará os 8.900 euros e levarase a cabo nas próximas semanas.