A praza Daniel Rodríguez Castelao experimenta un importante lavado de cara. O Concello de Culleredo ten en marcha as obras de renovación, que abordan os principais elementos  do espazo urbano.

Renovarase o parque infantil, colocando chan de caucho de tipo continuo, que favorece a mobilidade. Este chan, de cores para atraer ao público infantil, xa se pode ver na praza. Os xogos retiráronse para o seu arranxo.

O firme da praza é un dos obxectos principais da actuación. A empresa adxudicataria xa dispuxo a primeira capa de slurry, de cores. Nos próximos días disporanse dúas máis.

Ademais, o Concello modernizará o mobiliario urbano con novos bancos e papeleiras. Tamén se arranxarán os bordos e os valos, e efectuarase unha limpeza con hidrolavadora a presión nas beirarrúas.

As actuacións contan coa cofinanciación da Deputación da Coruña. O investimento é de 32.000 euros.