ES / GL

Finalizados os traballos de acondicionamento da praza Castelao

2 Enero, 2017. 17:52

Alcaldía

A praza Daniel Rodríguez Castelao, en Fonteculler, presenta unha nova imaxe. O Concello de Culleredo acaba de concluír as obras de renovación do punto, que se centraron nos principais elementos do espazo urbano, que concentra numerosas vivendas.

En concreto, renovouse o parque infantil, colocando chan de caucho de tipo continuo, que favorece a mobilidade. O chan é de cores para atraer ao público infantil e os xogos arranxáronse.

O firme da praza foi un dos obxectos principais da actuación. A empresa adxudicataria dispuxo varias capas de slurry, de cores. Ademais, o Concello modernizou o mobiliario urbano con novos bancos e papeleiras. Tamén se arranxaron os bordos e os valos, e efectuouse unha limpeza con hidrolavadora a presión nas beirarrúas.

As actuacións contaron coa cofinanciación da Deputación da Coruña. O investimento é de 32.000 euros.

Campaña da Policía Local

Coa praza xa acondicionada, veciños da zona puxéronse en contacto co Concello para trasladarlles o seu malestar con propietarios de animais de compañía que levan ao seu can ao espazo e non recollen debidamente as defecacións. A Policía Local efectuará unha campaña especial de vixilancia neste punto para evitar este tipo de condutas.

O goberno local fai un chamamento aos donos de mascotas para que cumpran con rigor a normativa de tenencia de animais e así non xerar molestias.