O Concello de Culleredo, a través da área de Xuventude, convoca aos mozos e mozas de 14 a 30 anos a participar no concurso de booktrailer ‘Moito Conto!’. O obxectivo primordial desta actividade é promover e difundir os hábitos lectores e comunicación entre os veciños e veciñas desta franxa de idade, así como a súa creatividade.

Pódense presentar propostas desde hoxe, martes 9 de maio, e ata o 28 de maio ás 00:00 horas. Do 29 ao 30 de maio, o público votará a través da páxina de Facebook e Instagram de Xuventude Culleredo.

Os proxectos poden tratar sobre calquera tema, libro, idioma e soporte, sempre que se trate dunha copia legal. Teñen que estar creados en lingua galega e valorarase positivamente que aparezan obras en galego nos proxectos presentados. O tratamento da crítica ten que ser sempre en positivo e, dado o caso, o vídeo ten que protexer a trama do libro, non pode desvelar nada relevante da historia.

O xurado entregará dous premios, un por cada tramo de idade: dos 14 aos 17 anos, e dos 18 aos 30 anos. Tamén haberá un premio do público, que se outorgará á obra que obteña un maior número de gústames no Instagram de Xuventude Culleredo. Os premios consistirán nun diploma, un ebook e un vale de 50 euros para comprar libros en Copyburgo (premios do xurado) e un diploma e un vale de 50 euros para comprar libros en Copyburgo.

Tamén haberá un sorteo a través do perfil de Instagram @xuventudeculleredo de 2 vales de 25 euros para comprar libros na devandita librería. Para poder participar no mesmo, haberá que ser seguidor deste perfil, darlle gústame na publicación da obra que máis che guste, cada perfil só terá unha participación no sorte e este realizarase mediante a ferramenta EASYPROMOS. As bases poden consultarse no arquivo adxunto a esta nova.