O AMPA do CEIP Ría do Burgo, situado na Corveira, celebrou o sábado pasado o seu primeiro acto nas novas instalacións levantadas polo Concello. O polideportivo cuberto acolleu a festa de fin de curso.

A concelleira de Educación, Carmen Varela, e o edil de Deportes, Bernardo Peiteado, quixeron acompañar a pais e nenos na súa estrea dunha infraestrutura fundamental para o centro e para os veciños da zona. Trátase do cuarto pavillón deportivo radicado no municipio.

A actuación no polideportivo supuxo un investimento de 1 millón de euros. O proxecto
desenvolveuse en varias fases, inicialmente coa construción da pista e a cuberta e
posteriormente coa construción das bancadas e vestiarios. Aínda que, nunha primeira previsión, proxectouse que se tratase dunha pista cuberta, o Concello apostou por ampliar o proxecto a dotalo de servizos imprescindibles para xogadores e público.

Ademais, o plan contemplou a urbanización da contorna exterior coa creación de beirarrúas
que faciliten o acceso aos usuarios tanto desde a rúa como desde o propio colexio. Tamén se creou un espazo dedicado ao aparcadoiro de vehículos. Outra das características peculiares do recinto radica na auga das duchas dos vestiarios, que será quentada a través dun sistema propio de enerxía solar, de cara a mellorar a eficiencia enerxética, unha das metas nas actuacións que vén acometendo o Concello.

O alcalde de Culleredo, Julio Sacristán, recoñece sentirse "moi satisfeito" pola
inminente apertura dun recinto que proporcionará un servizo "moi necesario" tanto para a comunidade educativa do colexio como para os veciños. E é que coa finalización desta actuación, solicitada polo centro de ensino, poderanse realizar na polideportiva toda clase de actividades escolares, xa que o pavillón en horario escolar será utilizado polo colexio Ría do Burgo e fóra dese horario escolar utilizarase polos clubs federados do Concello.

Sacristán sinala que a construción deste pavillón "consolida o investimento continuado
que vén realizando o equipo de goberno nas infraestruturas deportivas do municipio". Desde 2007, o investimento en materia de equipamentos deportivos superou os 3 millóns de euros. Nesta época construíronse dous pavillóns, o radicado na parroquia de Almeiras e este levantado xunto ao CEIP Ría do Burgo, e cubríronse outro catro pistas, as emprazadas en Celas de Peiro, Castelo, Castro-Vilaboa, e no colexio Isaac Díaz Pardo do Burgo.