Coas miras postas en favorecer a rotación do estacionamento de vehículos nas zonas de maior demanda, o Concello de Culleredo impulsará o "aparcadoiro exprés" no núcleo do Burgo. Consistirá na reserva de varias prazas para un estacionamento limitado, un máximo de media hora que non requirirá o pago de tarifa.

Serán catro os puntos onde se instaure este "aparcadoiro exprés": a praza de Europa (a ambos os dous lados da AC-211), a avenida de Ribados (xunto a Sanjurjo de Carricarte e Hersa), a avenida de Galicia (entre a AC-211 e a Costa da Lonxa) e o Edificio de Servizos Múltiples (detrás da parada de bus).

En cada un destes puntos, serán 10 as prazas nas que se estableza o estacionamento limitado. Estarán debidamente sinalizadas mediante zona azul e un cartel identificativo que informe das características destes aparcadoiros.

Con esta medida, o Concello quere favorecer a actividade comercial e hostaleira do municipio. Por iso, implantaranse nos puntos estratéxicos onde existe un maior movemento de vehículos e que por tanto convén solicitar un equilibrio no uso dos aparcadoiros para que os cidadáns poidan realizar desde compras até xestións bancarias.

A concelleira de Seguridade, Alicia Ferreiro, sinala que o se pretende especialmente e evitar excesos de condutores que deixan os seus vehículos durante moitas horas nestes puntos. Para iso, sinala existen no Burgo moitos aparcadoiros. "Non podemos ter ocupados vos puntos de maior actividade comercial cos mesmos coches cando existen alternativas", razoa.

En todas as zonas onde se instaurará existen numerosas rúas lindeiras e espazos de aparcadoiro para poder deixar un vehículo máis tempo. Por exemplo, na contorna do Edificio de Servizos Múltiples, existen numerosas prazas na rúa Ferrocarril, en Moncho Reboiras ou en Acea de Ama para aparcar o coche sen problema. Co aparcadoiro exprés favorecerase aos veciños que queren realizar xestións na dependencia municipal.

O mesmo ocorre nas outras zonas: a avenida de Galicia e a praza de Europa constitúen dúas dos principais puntos comerciais do Burgo. E coa implantación de Ribados propiciarase o aparcadoiro para as rúas peonís Sanjurjo de Carricarte e Hersa, que albergan numerosos negocios.

O uso destas novas zonas de aparcadoiro estará controlado pola Policía Local. As patrullas a pé que estarán permanentemente nas zonas urbanas serán as encargadas.