O acondicionamento nas vías públicas que serven de acceso a vivendas constitúe unha dos principais esforzos económicos que pretende acometer o Concello de Culleredo. Nestes momentos, prepara a remodelación dun dos accesos a unha zona eminentemente residencial: A Zapateira.

O Concello renovará a entrada desde a zona sur, en concreto desde a parroquia de Orro. Trátase da estrada que parte desde o núcleo de Figueiras, que presenta un estado astante deteriorado polo seu uso, quizais agravado polo tránsito de camións para o transporte e madeira.

A obra consistirá na pavimentación completa da estrada, que chega até a contorna da urbanización Vallesur. O investimento, procedente das baixas da contratación do Plan de Obras e Servizos provincial, supera os 40.000 euros.

A actuación atópase en proceso de contratación, polo que o Concello confía en que poida empezar nas próximas datas, a condición de que as condicións meteorolóxicas o permitan.

"É unha vía importante no municipio e necesita unha reparación urxente", afirma o alcalde de Culleredo, Julio Sacristán. O dirixente destaca que son decenas de residentes os que empregan o viario para chegar ás súas casas, e por iso o equipo de goberno fixou a actuación como "prioritaria" para este ano.