O Concello de Culleredo puxo a disposición dos afectados a relación de bens a expropiar, feita pública pola Deputación da Coruña, para a construción das ansiadas beirarrúas na Hermida, na estrada provincial que une Vilaboa coa casa consistorial. A relación de bens, ademais de estar xa no taboleiro de anuncios do Concello, sae publicada hoxe no Boletín Oficial da Provincia.

En total son 63 as parcelas afectadas polo proxecto de expropiación. Na maioría dos casos, ocuparanse hortas ou frontes de vivendas.

O levantamento das actas previas de expropiación terá lugar o próximo 26 de setembro na casa consistorial de Culleredo, en horario de 16.30 a 19.30 horas. Este acto servirá para determinar os dereitos afectados, o valor destes e os prexuízos determinantes da rápida ocupación, sen prexuízo de trasladarse ao lugar das leiras se se considera necesario.

Os afectados dispoñen até o mesmo día do levantamento de actas para formular as alegacións que consideren oportunas coa finalidade de corrixir os posibles erros que poida conter a relación de bens publicada.

O goberno local celebra que o proxecto se desbloquease. Aínda que a actuación corresponde á Deputación ao tratarse da súa estrada, e trátase tamén da institución que executa a expropiación, o Concello de Culleredo asume o gasto, duns 279.000 euros.

O Concello explica que as deficiencias na vía proceden da falta dun espazo seguro para os peóns. Na subida desde a Nacional 550 até preto de Fontemaior non existen beirarrúas nin beiravías, polo que os viandantes ven obrigados a invadir a propia calzada. Agora, a maleza invade as marxes, polo que o pouco espazo que quedaba para os peóns, viuse aínda máis reducido.

Coa actuación de construción de beirarrúas mellorarase notablemente a seguridade viaria para os veciños da Hermida e Ou Bosque, que enlazan camiñando a diario tanto con Vilaboa como con Tarrío.