O esforzo dos pais do colexio de Tarrío viuse recompensado co bo tempo que reinou na xornada de onte sábado 25. A Tarriomería, evento organizado pola ANPA e CEIP coa colaboración do Concello de Culleredo, reuniu a centos de pais, alumnos, ex alumnos, veciños e amigos do centro.

Desde as 10.30 e ata as 20.00 horas, as instalacións do colexio acolleron exhibicións de patinaxe, karate, aerobic, judo, ou ballet; inchables; talleres de maquillaxe, decoración, manualidades, bólas de malabares, pulseiras ou fotografía; actuacións musicais; comida de confraternización; contacontos; xogos de familia; e baile e karaoke.

A exhibición de aerobic foi un dos momentos máis esperados polos participantes, entre os que se atopaba o alcalde de Culleredo, Julio Sacristán, así como diversos concelleiros, como o primeiro tenente de alcalde, José Ramón Riobóo, ou a de Educación, Carmen Varela.

Para comer o menú foi diverso. Callos, paella e churrasco eran os pratos que se elaboraron no propio colexio. Ás 20.00 horas sorteouse un xamón entre as persoas que recibiron ticket nas consumicións.