Culleredo regresará desde hoxe, venres 4, e ata o domingo 6, á Idade Media. O Burgo lembrará o seu pasado templario co Mercado Medieval que encherá o paseo marítimo dunha infinidade de personaxes da época.

 

O concelleiro de Dinamización Local, Juan Carlos Lovelle, e a edila de Promoción Económica, Marta Iglesias, presentaron o evento. O mercado abrirá as súas portas ás 18.00 horas, ata preto da media noite. O sábado e o domingo o horario será de 11.00 a 0.00 horas aproximadamente.

 

O Mercado Medieval ofrecerá distintas opcións para todos os gustos. A ambientación musical e os espectáculos repetiranse ao longo do tres xornadas (A continuación pode descargarse a programación).

 

Quen se achegue ao Burgo poderá atopar desde lanzadores de lume, a cetreiros, bailarinas orientais, comepedras, etc. Nas rúas do Mercado haberá unha ampla variedade de postos. A alimentación e a artesanía serán os principais atractivos. Os nenos contarán tamén cun espazo destinado ás súas actividades, polo que será un evento propicio para acudir en familia, destacou o concelleiro de Dinamización Local.

 

Lovelle resaltou a idoneidade do marco que ofrece o paseo da ría para levar a cabo este Mercado Medieval. "Animamos aos veciños da comarca a que se acheguen ata Culleredo para mergullarse nun ambiente medieval moi entretido", apuntou.

 

Pola súa banda, Iglesias destacou a función de "dinamización comercial" que pretende o Concello con este tipo de eventos. "Estamos seguros que atraerá a moita xente, xerando actividade no municipio", sinalou.