O Concello de Culleredo lanza varios programas educativos para apoiar aos veciños na medida das súas competencias na materia.

En "Ponte a punto", o Concello de Culleredo abre os centros educativos, tras a conclusión da actividade lectiva, para levar a cabo clases de apoio aos alumnos do municipio. É unha iniciativa enmarcada no plan do Concello contra o fracaso escolar, que ten como finalidade axudar aos estudantes con maiores dificultades a sacar adiante o curso.

O Concello ofrece ademais clases de apoio para preparar as probas libres coas que se pode obter o título de graduado en Educación Secundaria Obrigatoria (ESO). O programa "Supérate" permitirá a mozos que no seu día abandonaron os estudos completar a formación Secundaria Obrigatoria.

O goberno de Culleredo tamén apoia aos pais e nais no seu traballo educativo cos seus descendentes. O goberno local abre a inscrición na Escola de Nais e Pais, un proxecto que pretende servir de apoio aos participantes no desempeño do seu papel cos seus fillos.

Información: Concellaría de Educación, sita en Vila Melania (Vilaboa), ou no 981 661 208.