Dende a Concellería de Desenvolvemento Socioeconómico, Turismo e Festas do Concello de Culleredo vaise levar a cabo un curso de Aplicador Manipulador de Productos Fitosanitarios ( Nivel básico). Trátase dun curso de 30 prazas, cunha duración de 27 horas e estará dirixido aos veciños/as empadroados/as no Concello de Culleredo de 18 anos ou máis.

Deben realizar este curso todas aquelas persoas que desexen solicitar o carné de Manipulador/a de Productos Fitosanitarios, posto que o diploma acreditativo de ter superado o curso é un requisito indispensable que se exixe para obter dito carné. (R.D. 1311/2012 de 14 de setembro polo que se establece o marco de actuación para conseguir un uso sostible dos produtos fitosanitarios. BOE nº 223, do 15 de setembro de 2012):

• Agricultores que non dispoñan de persoal auxiliar na mesma explotación.
• Persoal auxiliar de empresas e explotacións agrarias dedicadas á aplicación de productos fitosanitarios.
• O persoal auxiliar dos establecementos de venda ao público de productos fitosanitarios.

O obxectivo deste curso é asimilar os coñecementos xerais en materia de axentes productores de danos nos cultivos e a analise e valoración destes, así como os métodos de loita e protección máis axeitados a cada caso; profundizar no coñecemento dos procedementos indicados para a manipulación e utilización de praguicidas e o tratamento dos residuos tras o seu uso; completar os coñecementos referidos á maquinaria de aplicación de praguicidas; potenciar a prevención de riscos laborais, optimizando a saúde laboral, a protección do medio ambiente e o uso das boas prácticas fitosanitarias e actualizar os coñecementos sobre aspectos referidos á Seguridade Social Agraria.

A información e as solicitudes para acceder a esta acción de formación levaranse a cabo dende o Centro Municipal de Formación e Emprego " Pablo Picasso" do Concello de Culleredo, situado na rúa Antonio Machado, s/n. O Burgo – Culleredo (981664204).

O prazo de solicitude será do 11 ao 15 de ABRIL de 2016, de 9:00 a 14:00 horas. En caso de que o número de solicitudes supere ao de prazas, realizarase un sorteo público.